أحمد المصري

الذين لا يتذكرون الماضي .. كتب عليهم أن يجربوه مرة أخرى

Archive for February, 2008

يا لهوي يامة

Posted by احمد المصري on February 19, 2008

swahlcom_7f74.jpg

  

       و انا صغير كنت دايما بفكر في معاني الكلمات و التعبيرات المصرية الأصيلة اياها ، و لحد دلوقتي بحب اتسلى باني افكر في اصل الكلمة و جات منين ، و لكن هناك بعض المصطلحات الجديدة التي ظهرت من غير ما نحس بيها زي كلمة ” نفسنة “

و الله انا ماعرف ظهرت امتى الكلمة دي و لكني واثق انها  مش من مدة بعيدة ، المشكلة اني كل اما اسأل واحد كلمة نفسنة دي ظهرت امتى ، يبصلي كدة و كأني مش من البلد دي و يقولي يااااه من زمان اوي انت اول مرة تسمعها ولا ايه؟

ماهي لو هي من زمان اوي كدة انا كنت فين يعني؟ كنت في الحمام مثلا وقت ما اخترعوها؟

لكن مفيش حد عارف  ، و على الأرجح هي كلمة و بدأت تروح من لسان للسان لحد ما بقت جزء من اللغة العامية الشبابية المصرية .

و لكن كلمة نفسنة تحليلها سهل ، انا فهمت معناها اول مرة سمعتها من مجرد الاشتقاق اللي هي جاية منه ، نفسنة مشتقة من نفس ، المهم معناها موحي بانها بتوصف واحد قلبة اسود يعني ، حقود او حسود  يعني اللي بيمارس الحسد مرة كدة مع اصحابه يبقى بينفسن .

و لكن مهما الشباب اخترعوا من كلمات فا عمرها ما هاتيجي شيء جنب الكلمة الأثيرة ” يادلعدي “

الكلمة دي انا سألت فيها الناس بأشكالهم و ألوانهم علشان حد يقولي معناها ايه بالضبط و جاية منين ماحدش عرف

الغريب ان اكثر واحد حسيت انه اقنعني الى حد ما بمعناها رغم انه كان واضح جدا انه بيفتي هو واحد تونسي

رغم انها كلمة لا يشعر بها الا مصري أصلا . و قال لي انها مشتقة من ” يا دلع عدي “

يعني بيقول واحدة بتدلع ” عدي ” طبعا هي واضح انها فتوى و لكنها مقنعة بصراحة .

       دائما ما كنت ألاحظ شيء  في لغتنا الجميلة و الذي بدأ بعض الشباب يلاحظوه مؤخرا أيضا و  هو الأسئلة الغبية .

هي مش أسئلة غبية ولا حاجة بدليل اني مرة حاولت ادور على بديل لقيت اني مضطر اقولها ،

و اقصد الأسئلة اياها بتاع واحد صحى من النوم تلاقي اخته بتقوله ” انت صحيت؟

الأمر ده يحصلنا كلنا عادي

ولكني للأسف الشديد أنا  مش بقدر اعديها و ده بيحطني في مشاكل محرجة كتيرة .

يعني المدير بتاعي ذات يوم على الصبح كدة لقيته بيتصل في  مكتبي و لما رديت لقيته بيقولي اللي كنت خايف اسمعه منه في يوم من الأيام

صباح الخير يا احمد .. انت جيت ؟

صدقوني حاولت كتير أقول ايوة زي البني أدمين و لكن الإغراء كان أقوى من إحتمالي  بصراحة فا قلتله ” لا يا فندم ماجيتش ، انا بمشي و انا نايم ، بس لو تحبني اصحى و اجي مفيش مشكلة “

مش لازم تعرفوا قالي ايه بقا

و لكن أطرف شيء سمعته في الموضوع ده و احمد الله انه لم يحدث معي و الا لكنت افترشت الأرض ضحكا

انه في احد المطارات و الكلام على لسان اللي حصله الشيء ده .

 انه بعد ما نزل في الوجهه اللي رايحها و مستني شنطته وجد هذا الشخص ان احد امتعته ضائع ، فا طبعا قرر يروح المكان بتاع الامتعه المفقودة و قال للموظفة ان احد شنطة مفقود ، و هنا قالت الموظفة ما لا يمكن ان يقال

سألته سؤال اقل ما يقال عليه انه عبقري  و قالت له ” هل حطت طائرتك؟ “

و بصراحة الراجل ما إتوصاش و قال لها

” لا و لكني اعيش تجربة الخروج من الجسد و جاي اطمن على الشنط بس “

       ستار اكاديمي هو المكان اللي بيتجمع فيه شوية شباب هايف بيتم انتقائهم بعناية شديدة، لان فعلا الموضوع صعب ، انك تكون في قمة الهيافة و صوتك حلو او بتعرف تمثل و كمان أمور ؟

الموضوع يبدو صعب فعلا

المهم شاء القدر اني بقلب في القنوات لقيتها شغاله و انا من الرجعيين اللي مش بيتابعوها للأسف و لكني وجدت حوار ملفت  جدا بيتم بين الشباب في البرنامج.

وجدت الاخ الفرعون المصري و ممثل جمهورية مصر العربية في ستار أكاديمي و قد غلبته الوطنية و حب مصر و قاعد يوضح لزملائه أد ايه الفراعنة دول كانوا حاجة كبيرة .

 تذكرت وقتها اني اعتذرت عن الحديث في احد الندوات علشان المعلومات اللي عندي و اللي كنت عارف انها صحيحة بنسبة كبيرة كان فيها شوية شك بس و انا مش هاقول قدام الناس الناس معلومات ربما تطلع مغلوطة .

و لكن اخينا المصري الوطني اللي لسانه كان بيشع وطنية كان بيقول ما لم أتخيل اني سأسمعه يوما ما

اخينا زاهي حواس تو (2) قعد يوضحلهم ازاي الفراعنة كانوا طولهم 1000 زراع و ازاي الأهرامات دي الحجر الواحد منها بحجم الغرفة اللي هما فيها عشر مرات ( يعني تقريبا الحجر الواحد بحجم هرم سقارة كله )

و ان الفراعنة دول اول حضارة في العالم يابني ده مفيش حد قبلهم خالص دول من سبع آلاف سنة ” قبل الميلاد “

فا تطوع احد الاخوه الزملاء الواسعين الثقافة  لتصحيح معلوماته و قال ” يا راجل العصر الحجري أقدم حضارة !!!!

و قبل ان ينفجر أحد شراييني من النقطة اللي جاتلي لقيت المصري الهمام بيقوله و يا ريته ما قاله ” يابني ماهو الفراعنه دول العصر الحجري امال بنوا الهرم من الحجارة ازاي .

و عندئذ اظهر الشاب الآخر مدى اقتناعه و قال اةةةةة

و معها كنت اقول

يالهوي يامةةةةةةةة

Advertisements

Posted in Uncategorized | 4 Comments »