أحمد المصري

الذين لا يتذكرون الماضي .. كتب عليهم أن يجربوه مرة أخرى

حكايتي مع الجيش المصري

Posted by احمد المصري on May 31, 2007

 اعتقد انها كانت منذ 3 سنوات تلك الحادثة .. حين قررت ان أقدم أوراقي للجيش ..
و لعدة أسباب كنت قد تخلفت عن التقديم في موعدي الأصلي  مما أخرجني قانونيا من دائرة المستحقون للإعفاء الا ان كان اعفائا طبيا .
و لم يكن أمامي إلا ان العب بورقة الإعفاء الطبي .
في الحقيقة لم اكن أعاني الا من شيء واحد وقتها.. و هو ما عرفت انه يسمى بالتهاب في العصب السمعي يجعلني ضعيف السمع في الأصوات ذات الذبذبات العالية فقط مثل صوت أجهزة المحمول القديمة.
و اقنعني  بعض الناصحين بان مشكلتي الطبية هذه ستجعلني ارتاح كثيرا من دخول الجيش و سيأمرون باعفائي بسهولة مع تقارير الاطباء
و كما يقول د. احمد خالد توفيق ” كنت ساذجا ساذجا ساذجاااااااااااااا  “

و بدأت رحلة التقديم بالذهاب الى منطقة التجنيد التابعة لي …
و بعد معاناه مع الزحام  و مع العساكر الذين يحاولون تعويض ما يلاقونه من معامله في الطلبة المساكين ،  كنا واقفين صفوفا و هناك طبيب يمر علينا و يقول من يشتكي من شيء يقول.. و عندما وصل لي قلت له أريد التحويل لقوموسيون طبي  عندي مشكلة في السمع لن تراها ..
و كان الرجل كريما للغاية فقال لي تم تحويلك…

و ذهبت الى منطقة التجنيد الكبرى في حلمية الزيتون …
لا انسى ابدا ذلك المكان ..ضخم جدا و لكنه للحق منظم كعادة أماكن القوات المسلحة ..
و هناك رايت شيء عجيب جدا …
رايت تفرقه غير انسانية بين المؤهلات العليا و المؤهلات المتوسطة و الغير حاملين للمؤهلات
كان ذلك مريحا الى حد ما لانني من الفئة الاعلى هنا و لكني تذكرت ما كان يحدث قديما في اميريكا من اضهاد و عنصرية للزنوج.. لم اكن استبعد في لحظة الان ان يتم محاكمة شاب مؤهله متوسط لانه كشر قليلا في وجه احد حملة المؤهلات العليا..

و ما اثار استيائي اكثر اننا كنا نثير ضجة قليلا في احد القاعات بكلامنا فجاء احد الصولات و قال لنا ..

” مش عاوز اسمع دوشة خالص .. احنا بنعاملكم كويس مش عاوزين نعاملكم زي بتوع المؤهلات متوسطة و اللي من غير مؤهلات “

يا سلااام
  و الله قال ذلك في حضور الفئات الثانية ووجدت نفسي انظر اليهم و ان ارى في اعينهم نظرات الذل و الهوان الذي احسوا به ووجدت نفسي اعرف الان لماذا كان ابي يهددني في المرحلة الإعدادية باني ان لم استذكر جيدا سيدخلني دبلوم .
 و لكن هذا ليس ذنبهم ان دخلوا دبلوم مثلا و منهم من سيكون أحسن في المجتمع من معظمنا
و لكن هذا هو الحال في الجيش للأسف .

وقفنا و تم ترشيح معظمنا لنكون ظباط !!
و هنا رأيت شيئا جديدا .. العساكر الذين كانوا يحيطون بنا و يعاملوننا اسوأ معاملة قد تغيرت معاملتهم لمن ترشح ظابط .. فكان ياتي و يقول انت يابني اقعد هنا و ماتتحركش لحد ماننادي اسمك ثم ياتي الي و قد ترشحت ظابط   و انت يا باشا اتفضل شوية و هاننادي اسمك ان شاء الله “

ابتسمت وقتها في مرارة و كنت اختلف عن الطلبة من حولي اني اكبر قليلا منهم و في وسط حياتي العملية مما يكسبني جرائة في التعامل دائما ..
و ناديت عليه و قلت عليه انت . تعالى .. فجاء و هو متسائل و قلت له انت اسمك ايه يابني
قالي فريد يا باشا  .. قلتله انت في أي وحدة يا فريد  قالي مشاه ميكانيكا يا باشا
فربت على كتفه و قلت له اوكي يا فريد شكرا
انا تعلمت ان التعامل مع امثال هذا العسكري كأنك من موقع اعلى منه يؤتي ثماره دائما . و هاهو الان قد  أتى ثماره و إعتقد العسكري البسيط اني باشا بجد و واصل يعني .

جلست في مكاني و بدأت أراقب ما حولي في فضول ….
القومسويون الطبي الرئيسي في الجيش المصري .. هو المكان الوحيد في اعتقادي في العالم اجمع الذي ينظر فيه الأصحاء الى أصحاب المرض و المعوقين بنظرة حسد…
و الله كم ضحكت بسبب ذلك
عندما يدخل احد الى الكشف و يخرج ليبصم فالبصمة هنا معناها الإعفاء ..
اجد احد الشباب عافاهم الله  احد أرجله  بها اعاقة فيلتفت اليه الطلبة و يبدءوا يتهامسون  ايوة يا عم اهو ده ضامن الاعفا و  ينظرون اليه و يقولون يا بختك يا عم .. و يحلم كل واحد فيهم ان يكون مثله :S
 بدون مبالغه فعلا كانوا يحسدونه و يتمنون ان يصبحوا مكانه في تلك اللحظة ..

المهم بدأت أراقب الأوضاع قبل دخولي للكشف ثم نادوا عليا و جلست مع الذين سيدخلون كشف السمعيات.
و أصابني الإحباط أول ما جلست ..

فقد كان  اصح من حولي  طبله اذنه مثقوبة ..!!!
و انا طبيعي في السمع العادي و ما اعانيه و اطلب الاعفاء من اجله مشكلة داخلية لا علاقة لها بالسمع العادي ..
المهم جلست و تحملت العساكر الذين يتكلمون معي بصوت عالي جدا باعتبار اني اكيد اطرش
حتى دخلت للدكتور ..
حاول الكشف علي ثم طلب مني ان اجري رسم سمع جديد ثم اذهب اليه و قال لي ان اجري عملية غسيل لاذني ايضا لتنظيفها من الشمع ..
رجعت و قمت بما طلبه مني
و رجعت الى القومسيون  بعد أسبوع آخر ..
المفترض ان يتم رسم السمع الذي طلبوه في مستشفى عام تابع لوزارة الصحة و لكني وجدت انه صعب جدا و يأخذ وقت كبير ليس متاح عندي فقررت ان أجريه في احد العيادات الخاصة و اللي يحصل يحصل

و دخلت للدكتور ثانيا و هذه المرة وجدت اثنان أطباء ..
الحق يقال اني كنت موفق هنا لان الطبيب الذي اجرى لي كشف السمع في عيادته طلع صديق لهم و كان طبيب في الجيش سابقا مما أعطى للشهادة التي معي مصداقية كبيرة ..
و لكن لا بد ان يجروا لي اختبار اخر
و بعد الاختبار بدأو يتحدثون الانجليزية و هم لا يدرون اني أجيدها و كنت  اضع على وجهي علامات عدم الفهم  حتى ادعهم يتكلمون بحرية .
و عرفت انهم يحسبون حالتي بمقياس درجات و اني في الوسط و الاثنان مختلفون هل انا لائق ام لا ..
و جلست منتظرا من منهم سيفوز و يحدد مستقبلي …!!

في النهاية قرروا بالإجماع تحويلي لطبيب أعلى منهم
و لم يكن هناك أعلى من هذه اللجنة غير ما يسمونه بالمستشار الطبي.

طبعا أثناء كل ذلك كنت أعاني مش مشاكل الروتين و التوقيعات و كل ذلك و انا أصلا من أعداء المعاملات الورقية  و لكني كنت أتحمل منتظرا النتيجة .
جئت مرة اخرى بعد عشرة ايام و أخذونا في حافلة الى مجمع طبي تابع للقوات المسلحة .
و لم يعد هناك طلبة فقد تمت تصفيتهم كلهم و لم يبقى غيري انا و خمسة اخرون مواعيد كشفهم مختلفة عني
و جلست في قسم السمعيات منتظرا دوري و لكنت أصابني الإحباط مرة أخرى

كان جالسا بجانبي منتظرا دوره أحد المجندين في الجيش … قد تم تجنيده خلاص و له في الجيش ثلاثة أشهر حتى الان ..
و ما أحبطني ان احد عينيه كانت بها مشاكل واضحة خطيرة و كانت مغلقة تقريبا  و له إذن طبلتها مثقوبة .. !!

نظر الي مبتسما و هو يحاول ان يجر أطراف الحديث معي و سألني
عندك ايه؟
لم اجد ما أقوله له  فلا يوجد عندي شيء مقارنه به .. فقلت له ..  لا ابدا انا ضابط بالمدفعية و اطمئن على نفسي ..
طبعا قلتها بلهجة تحمل تعالى قليلا حتى يقتنع و يسكت..
و دخلت للطبيب ..
عميد دكتور كبير في السن بشوش جدا وجدت عنده الطبيب الآخر الذي كشف علي المرة السابقة..

طلب مني الدخول الى غرفة مغلقه ليبدأ اختبار السمع و هو عادة اختبار بان تضع سماعات في اذنك و ان سمعت أي شيء في أي اذن تشير بيدك على الاذن التي تسمع فيها الان .

و لكن غلبني فضولي اخيرا و سالته .
يا دكتور انا ممكن اضحك عليك و اقولك اني مش سامع و خلاص .. فا كيف تعرف بدقة ؟
ابتسم  و قال لي  نعرف الكاذب فورا فلا تقلق انت .

دخلت و اديت الاختبار و خرجت
ووجدته يتجه بنظرة الى الطبيب الاخر و يقول له
يا سيادة النقيب   ال ( مصطلح )  عنده رائع  و ال ( مصطلح )  ممتاز
انا سمعت ممتاز و رائع فا قلت الحمد لله على ما قسمه الله لي و ليكن هو الجيش .
ثم اتجه بناظره الي و قال هات بطاقتك يا احمد علشان تبصم
ابصم؟؟؟؟؟؟
ده  معناه اعفاء ؟
وجدت الممرضة تقول لي ” مبروك يا احمد
فقلت لها  مبروك ليه هو مين قالك اني ماكنتش عاوز ادخل الجيش؟
الدكتور نظر لي و قال لي اوك يا احمد تحب تدخل؟

المهم تعديت الموقف
و انا سعيد اخيرا بعد معاناة ما يقرب من شهرين
و قلت لهم متى سأاخذ الإعفاء؟
قالو ليا الأول تأتي الى حلميه الزيتون بعد 15 يوم
قلت ماشي
بعد 15 يوم ذهبت و قلت ها
قالو لي انت عندك لجنة طبية عليا في المجمع الطبي الرئيسي للقوات المسلحة بعد 25 يوم
قلتلهم لجنة عليا ازاي يعني؟
هو في اعلى من اللي كنت فيها؟ مافاضلش غير وزير الدفاع بقا هو اللي يكشف عليا.
نظر لي بعدما قلت هذه الكلمة و قال لي انت واقف بتعمل ايه يلا امشي و روح على هناك بعد 25 يوم

و بعد 25 يوم من عدم الفهم لما يحدث حان موعد الذهاب..
الغريب في الامر ان الدفعة التي قدمت فيها و لأجلها اكشف طبيا الآن كانت قد دخل من قبل منها الجيش خلاص و بدءوا معسكر التدريب و انا لازلت في الخارج . لا اعرف ما سيحل بي حتى الان ..

ذهبت الى هناك و قيل لي انهم سيجرون لي اختبار سمع أولا ثم ستعرض على اللجنة العليا و معك نتيجة التقرير ..
في الحقيقة المكان أعجبني و يبدوا انه مخصص للضباط الكبار فقط  و قد كان منظري ملفتا و انا امشي داخله
ذهبت لأجري الاختبار ووجدت من يجريلي الاختبار هو العميد المستشار الطبي الذي قرر أني غير لائق .
و سألته عما يجري فقال لي لا تخف فقط خليك صريح و ربنا يسهل .
يبدوا انه يحاول ان يزيل قلقي فأقلقني أكثر .. فقد وجدته لا يعرف ما سيحدث هو الآخر
بعد الاختبار قلت له ها اروح فين؟
قال لي روح بيتكم و تعالى بعد يومين
و عدا اليومان و انا لا افهم أي  شيء على الإطلاق .. حتى وجدت اني لو كنت قبلت من البداية لكان اقترب موعد انتهاء الخدمة العسكرية الآن أصلا ..

دخلت المجمع و دخلت قاعة جميلة للانتظار و فوجئت بوضع غريب جدا
هذا المكان مخصص للكشف الطبي على الضباط قبل كل ترقية .. و أنا الوحيد المدني الآن فالكل ضباط كبار و العساكر حتى ليس مكانهم هنا !!

و بدأ حوار أعجبني بين الضباط عن ما يعانونه من العساكر و كان حوارا ممتعا لي لأقصي حد ممكن فقد كنت اسمع الآن وجهة نظر الطرف الآخر و ليس كلام المجندين المتشابه عما يعانونه على أيدي الضباط .
جلست استمع فقط و لا أشارك في ذلك الحديث الفائق المتعة بالنسبة لي لكن لا يوجد متسع هنا الآن لأحكي ذلك الحوار ..

المهم جاء موعد دخولي ..
و دخلت لأجد نفسي امام اكبر مجموعة من اللواءات رايتها في حياتي مجتمعين هكذا .
لا اعرف شعرت برهبة شديدة و انا أرى مجموعة من اللواءات و عيونهم متركزة علي فقط و بدأ ينظرون الى التقارير ثم سألني احدهم هل تؤلمك اذنك؟  هنا قلت اكذب و  اقول نعم ثم تذكرت اني لا احب الكذب كثيرا و تذكرت كلام الطبيب الأخير و هو يقول لي خليك صريح فقط
فقلت لهم لا على الإطلاق  فقط تضايقني أحيانا في السمع .
قال لي اوك انتظر خارجا
بعد قليل خرج لي احدهم و قال لي اذهب الى منطقة تجنيد حلمية الزيتون بعد 15 يوم
قلت له هل اخدت إعفاء ام ماذا؟ قال لي ستعرف النتيجة هناك

و هنا ظهرت في عقلي تلك اللحظة أفكار غريبة كانت اقلها ان افجر نفسي في هذا المكان و لكنها لم ترتقي لان تخرج للعلن الحمد لله ..

المهم
بعد 15 يوم ذهبت اولا الى قسم الشرطة التابع له انا بناءا على طلبهم لاختم ورقة من ما يسمى بشيخ الحارة و لم اكن اعرف ان شيخ الحارة هذا لا يزال موجودا و لم اجده فتطوع احد شيوخ الحارات الثانين و قال لي يابني مش مهم الامضا دي دلوقتي انت  سافر  بس الأول شوف اللي هايتعمل هناك ايه ..
و ذهبت الى حلمية الزيتون في موعدي  و ظهر صول و قال لي
مبروك انت إعفاء ، قلت له قديمة اتقالتلي مرتين قبلك انا عاوز ورقة الإعفاء و انا أتأكد ، قالي هات  الورقة  ( اللي كان المفروض أمضيها من شيخ الحارة)  و خد الورق ده اطلع بيه على منطقة التجنيد التابع لها قلت له لم امضيها بعد؟
قال لي نعم اذن روح ياخويا و هاتها و تعالى بعد اسبوع؟
قلتله بعد اسبوع ليه؟ قالي هو كدة ميعادك بعد اسبوع ..
خرجت و انا احمل في اعماقي كمية عصبية لم اعهدها في من قبل و لكني كالعادة لم يظهر شيء منها على ملامحي و لكن لو أي شخص كان احتك بي في تلك اللحظة لكنت قتلته .

و بعد عملية بحث مضنيه عن شيخ الحارة اياه وجدته و بعد ان قال لي من الاخر  حط خمسة جنيه في الدرج علشان امضيلك و مضا بالفعل بعدها .. ذهبت و اخذت الورقة و ذهبت تاني يوم الى منطقة التجنيد التي اتبعها انا
ووقفت في طابور طويل و عندما وصلت للشباك قلت للعسكري هذه اوراقي و اخدت اعفاء
متى يأخذ شهادة اللاعفاء؟
نظر للورق مفكرا ثم قال لي نعم نعم
غدا في الناسعة صباحا
تأتي الى مقر الكشف الطبي اولا ..!!!!!!!!!
قلت له ماذا؟ كشف طبي ايه؟
لا لا خلاص
انا عاوز ادخل الجيش ، انا كنتت باضحك عليكم انا سليم و الله و صحتى زي البمب
دخلوني الجيش يا عم انت انا بحب الجيش و عاوز اخدم وطني اصلا و الهروب من الجيش في خيانه للوطن
انا مش خاين  ”
امام تلك الثورة مني و الكلام الذي قلته .. تطوع بعض الشباب لشرح الموقف لي و انه إجراء فقط لابد منه و سينتهي فورا ..

ثاني يوم رجعت ووقفت امام مبني الكشف الطبي و حامت حولي الأفكار السوداء كلها ثم تقدمت في هدوء اليهم و قدمت اوراقي و قال لي العسكري الدكتور قدامه ساعتين و يجي استني
قلتله دكتور ايه يا اخ هو انتوا ناويين تكشفوا عليا؟؟
قالي لا لا هو اللي هايمضي ..
جلست و انتظرت حتى جاء الطبيب الصغير برتبه ملازم
و مضى لي شيء ما
المهم
وجدته يعطيني ورقة غريبة … بلاستيكية ،  ملونة …
لم استوعب في البداية و لكني أدركت بعدها اني امسك الان شهادة الإعفاء من الجيش

يااااااااااااااااه  ظللت واقفا فقط انظر اليها كثيرا و يمر بي كافة الاحداث التي مررت بها حتى أمسكتها الان

فما قرأتموه الان يعكس خمسة و عشرون بالمائة فقط من الأحداث التي حدثت لي اثناء تقديمي للجيش و لكني اختصرت كثيرا لكي يتسع المكان .
..احمد المصري ..

Advertisements

55 Responses to “حكايتي مع الجيش المصري”

  1. ctybrd said

    ده انا افتكرتك دخلت
    انت فاجأتني انك خرجت
    أمال اللي دخل وراح المخابرات وراح السجن وراح المخابرات تاني وتالت ورابع واتحول من وحدة لوحدة لوحدة وفي طريق الخروج راح نفس الطريق يبقى يقول إيه يا عم أحمد

    حاقولك حاجة انت ركزت على موضوع المؤهلات هم بيعاملوا المؤهلات كويس عشان المؤهلات عارفين حاجة اسمها إضراب عن الطعام بس لا أكثر

  2. Egyptian said

    يا رااااجل!!!

    الله يطمنك
    أصل انا عندي مشكلة صغيرة اكتشفت دلوقت حجمها الحقيقي
    كنت واخد تأجيل ينتهي في شهر 10 اللي فات، وانا كملت 30 سنة قبل شهر 10، و بالتالي المفروض كنت اخد اعفاء

    للأسف لسة ما رحتش لحد النهاردة

    ده انت يا راجل طمنتني قوي!!

  3. ايه التفاؤل ده
    أنا هاقدم فى شهر واحد الى جاي
    وانا سليم وعاوز أخش الجيش، بدل المخمطة الى اتعملت فيك
    بس ياريت تكتب الحوار بتاع الظباط الى كانو موجودين
    بجد مقال أكثر من ممتع ورائع جدا
    برغم طوله لم أشعر بالمملل أبدا

  4. شكرا على التعليقات و البوست الجاي ان شاء الله هايبقى كبير برضه و هايبقى حوار الظباط اللي سمعته ده جزء منه ان شاء الله

    و انا لا اقول اني اكثر من عانيت و لكن ان تدخل الجيش و تنتظر المعاناه و تتوقعها يختلف عن ان لا تكون اهم اي شيء على الاطلاق

    شكرا

  5. شمس الدين said

    بجد بجد تدوينة جميلة

    هو الجيش مش وحش اساسا بس المشكلة ان اللي قائمين عليه بيخلوا اشبه بمسخة

    و هما علشان البلد مفيهاش شغل فبيدخولا الشباب في دوامة بعد ما يخلصوا دوامات التعليم …و حلنبي بقي لما الشاب يعرف يبدأ حياتة !!!!

    تدوينة جميلة فعلا و اتمني ان تنشر مدونتك اكثر لانها تستحق

  6. هههههههههههه
    معلش والله اني باضحك بس فعلا مقدرتش امسك نفسي
    فعلا شر البلية ما يضحك
    انا برضه ليا حكاية بس اسرع بكتيييير منك مع يوم التجنيد والحمد لله اخدنا الاعفاء من اول يوم وفرحة الشهادة دي كانت اكتر من فرحة بكالوريوس الهندسة

  7. لا اله الا الله…كل ده عشان تاخد اعفا من الجيش..امال لو هتاخد جنسية تانية..ولا متهمينك بالخيانة العظمى كانوا عملوا فيك ايه…عموما لا يسعني في هذا المقام الا ان اقول قولة ملك ثقل الظل العالمي محمود يس للأخت الفاضلة متيحة كامل في الفيلم الي مش فاكرة اسمة دلوقتي…هي دي مصر يا عبلة…وبعدين يا اخي افتكر است شادية قالت ايه زمان…مش قالت ماتقولش ايه ادتنا مصر…قول هندي ايه لمصر…احلى حاجة بقى في البوست بتاعك الجامد ده..اني لقيت الجيل بتاعي بتوع احمد خالد توفيق…تحياتي على العرض الجامد ده…والله البكلرويوس فرق معاك اهة..

  8. شمس الدين
    ان شاء الله و اهو الواحد بيعمل اللي عليه

    أحمد الدرعة
    انا كمان كنت بضحك و الله و اهو الحمد لله و مبروك الاعفاء يا سيدي

    سكوت هانصوت
    جامد اسمك ده
    المهم يا سيدي بما ان اسلوب السرد ده عاجب الناس انا هاقولكم باقي البلاوي بقا في البوست الجاي
    شكرا لكل من علق

  9. Samir said

    جامده جدا يامعلم
    دا انتا صحيح كنت دخلت الجيش اسهلك من اللف ده كله
    الا قولي انت كنت بتسيب شغلك ومصالحك ازاي كل ده

    تحياتي ليك دي اول زيارة ليا ومش هتكون الاخيرة انشاءالله
    ابقى زورنا
    سلام ياباشا

    محمد سمير

  10. ابو مريم said

    عانيت يا عم احمد الله يهديك

    كل ده عشان العطلة والوقت الضايع وارهاق الاعصاب
    امال لوكنت اكلت الطبخة السودة والنوم على الرمل وتشرب مية صرف صحى معالجة كيميائيا تصيبك بفشل كلوى

    ولاالتشكيل عليك فى الطوابير التى تمتد الى ساعات الى ان تسقط من طولك
    او الجوووووووووووووووووووووووع واه من الجوع يا عم احمد

    ولللامانةمفيش فى الجيش شىء اسمه مؤهلات اوغير مؤهلات الا فى مركز التدريب بعد كده كله سواسية واللى يفرق اقدميتك العسكرية

    ةلا اقولك كفايةكدة

  11. باشا انت فين بقالك فترة مش باين
    وحشتنا
    محمد سمير

  12. لا كدهف الى
    انابقدم وربنا يسهل يعنى مش عايز اشوف الى انت والكثير شوافوه
    وبرضو ده مش هروب
    بس الجيش فى مصر بصراحه ملوش لزمه
    وربنا يعنك على الى انت فيه
    ولك منى خالص تحياتى

  13. شكرا يا جماعة
    انا انشغلت شوية و ان شاء الله الاحد في بوست جامد جديد
    سلام عليكم

  14. خالد said

    السلام عليكم يا جما عه

  15. خالد said

    ممكن نكون اصدقااء

  16. سلام عليكم
    خالد
    اهلا بيك يا سيدي لكن اعرف ان هنا مش برنامج شات
    شكرا على الزيارة و ان كنت شاكك انك قريت اصلا

  17. وفاء said

    طيب الان الى بيلتحق بالجيش ,, يعنى بالسنة هذى2007 بشهر 8 هيختاروه انه يكون ميلاد سنة معينة يعنى الى من مواليد عام 1982 او اى عام بس بيقولوا مثلا شهر ابريل او كذا يعنى ,,
    كيف بيختاروهم على حسب السنة وشهر معين

  18. شكرا على التعليقات
    وفاء هناك اتفاقيات لا نعرف عنها الكثير منها اتفاقيات بشأن تقليص اعداد الجيش المصري بحجة اننا في وقت السلم و لا يوجد مبرر من وجهه نظرهم لتطوير الجيش ، ثم انهم يعرفون بالتأكيد اعداد كل دفعة و على ضوء ما يريدون من اعداد يحددون دفعة معينة .

  19. وفاء said

    لا انا بسال انه يعنى ضرورى ياخذوا السنة دى لانه بجد مااتمنى انهم ياخذوا حد لانه بصراحه اعرف واحد ومانفسي انه يغيب يوم واحد وبجد والله نفسيته مش مرتاحه لانه بيقول لازم انه يقدم اوراقه ويعنى مااتمنى انه يغيب بجد

  20. هههههههههههههههههههههه
    ده حب بقا
    مش مهم الجيش بيصنع الرجال
    خليه يدخل شوية معلشي و ماتخافيش مش هايقابل حد غيرك جوة و يحبه :d

  21. محمود said

    اود الحصول على تصريح سفر خارج مصر او معافاة او تاجيل اى طريق واسرع طريقة كما انى مستعد لا اى طلبات
    العنوان الالكتونى nathaliedive@yahoo.com

  22. محمود said

    الرجاء الرد على رسالتى السابقة بخصوص تصريح السفر
    الرجاء المساعدة من اى حد يكون له سكة فى هذة المواضيع

  23. محمود said

    يا احمد يا مصرى يا اى احد لة معارف او سكة يساعدنيا فى الحصول على تصريح سفر او معافاة ولو حتى تاجيل بس اسافر انا عندى فيزا ومستعد لاى طلبات من اجل الحصول على تصريح السفر لو فى حد ممكن يساعد لو مقابل مالى انا مستعد ادفع رقم حلو ابعت على عهذا الاميل وانا ابعت رقم تليفونى nathaliedive@yahoo.com

  24. منصور said

    عاوز اعرف معادى فى الجيش علشان انا عايش فى السعودية انا مواليد1/8/89
    انا عاوز اعرف ضرورى علشان انزل

    منصور مجدى

    • م- عمرو said

      معادك فى الجيش 1/11/2011 لو انت حامل مؤهل عادى ولازم تسلم نفسك قبل يوم 18/1 تكون كشفت كشف طبى وربنا معاك –

  25. منصور said

    ضرورى يعم احمد المصرى

    (m_magdi555@yahoo.com)

  26. منصور said

    hdezf bdrfgf vzwasa may to apfde aswqzx edrfc vfde xzsawq qwersk to dsweq zsaqaz jbvcxf and to cdxtr nmbhk sis phgty trewv jush
    (
    mnsoyr)

  27. يا عم منصور انت ما قريتش البوسط ولا ايه؟
    ده انا طلع عيني على ما خدت الاعفاء هل تعتقد اني خبير بامور الجيش للدرجة دي؟
    و محمود اللي معلق قبلك اللي عاوزني اجيبله الاعفا ده كمان
    يا استاذ منصور و الله مش عاوز افتيلك في حاجة ماعرفهاش ماهو انا هاعرفها منين يعني؟
    شايفني العميد اركان حرب احمد المصري؟:D

  28. منصور said

    تشكر على الكلام الحلو دة كلك زوق

  29. سعد said

    طب ممكن نعرف هو ايه الي بيحصل في الكشف الطبي بالضبط اصل انا سمعت حاجات زي الزفت زي يقلعوك هدومك و يمسكوا حتت مبتريحش فياريت حد يقلنا هو ايه الي بيحص بالضبط

  30. mohamed ibrahim said

    انا متزوج من امريكية فهل هذا يعفى من التجنيد؟؟؟ هل ساحصل على اعفاء بسبب هذا؟؟؟ اتمنى الرد

  31. اعتقد فعلا سيتم اعفائك نهائيا
    شكرا على الرد على الرغم من اني لا اعرف لماذا اعتبرني الناس مستشارا للتجنيد 😀
    اشكرك مرة اخرى

  32. drahmedelaraby said

    والله يابنى اللى قالك ان فى تفرقه بين المؤهل العالى والمتوسط يبقى عبيط انا راجل دكتور اهو ومتبهدل فى الجيش بلم زباله ونشتغل نظافة اكتر من العادة والمتوسطة علاوة على شغلنا كأطباء هو ده الجيش يابنى

  33. drahmedelaraby said

    الراجل مواليد 89 ميعادة كمان سنتين لما يتم الواحد وعشرين ويسال برده
    والتانى اللى بيسال على البهدلة فى الكشف هما مبيبهدلوش الا اللى عايز يتبهدل يعنى اللى يتصنع المرض اما السليم بيقولو له تعالى على جنب
    اما الراجل المتجوز من اجنبية بيجو قبل الكشف ويندهو المتجوز من اجنبية او امة اجنبية يقف على جنب وتقريبا بياخد اعفا
    والراجل اللى عايز يهرب من الجيش ممكن لو تعرف دكتور فى منطقة تجنيد بلدك قبل ماتترحل على الحلمية لو مرشح ظابط انا ليا اتنين من صحابى طلعوا من الجيش نظر وهما نظرهم فل

  34. محمد said

    مبروك الإعفاء..

    قصة مؤلمة يا أحمد : )..
    لكن نهايتها جيدة..

  35. حسين said

    عاوز ابقى ضابط جيش اخر فرصة السنه دى السنة اللى فاتت طلعت عشان 2كيلوا زيادة ممكن تساعدنى

  36. حسين said

    هدفى وانا فى ابتدائى حاولت اقدم فى السانوية الحربية بس محدش رضى من اهلى عشان بعيدة ياريت تبعتلى اى رد

    شـكـراً

  37. حسين said

    هدفى وانا فى ابتدائى حاولت اقدم فى الثانوية الحربية بس محدش رضى من اهلى عشان بعيدة ياريت تبعتلى اى رد

    شـكـراً

  38. احمد المصري said

    يا استاذ احسن
    و الله انا لو اعرف شيء في الجيش ما كنت مريت باللي حصلي ده
    اساعدك اعمل ايه حضرتك؟
    انا اسف بس انا مش وزير الدفاع

  39. سيد نايس said

    اية دا ياجماعه علي فكره هو الجيش ملوش لازمه بس لم تكون غزب عنك هتعمل ايـــــة يعني والله انا كان نفسي اخد تاجيل ولا معفاه بس مفيش نصيب دخلت وسنه زيادة كمان وغير قابله للرفع بس المهم ان ربنا يسهل وخلص بقي مع ان الواحد هيشوف ذول بس مش ب إدك علي فكره كمان انا داخل في دفعه يعني كل مش عارف اقول اية تسمي دفعه العبيد بجد شهر 7 يعني الحر يموت لوحده من غير تدريب وربنا يكرم ونخلص عشان الواحد يسافر بقي في بلد ويكون نفسه والسلام عليكم ورحمه الله

  40. المدعى said

    بصراحة كلامك كلة رغى على الفاضى كان ممكن تختصر فى جملة مكونة من خمسة كلمات

  41. اسلوبك رائع ووصفك للأحداث أروع ، أخوك المجند المعفي مؤقتا

  42. يا رب مخش الجيش said

    طب باقولك اية يا سيدى انتا طبعا دلوقتى بقيت خبرة ممكن ترد على استفسارى انا دفات قلبى سريعة جدا عن الانسان الطبيعى حوالى 3 اضعاف الانسان الطبيعى انا ممكن اخد اعفا ولا حخش تجنيد

  43. يا رب مخش الجيش said

    XHTML: You can use these tags:

          

  44. احمد said

    انا قبلت خلاص في الجيش ومعادي قرب اوي
    ان شاء الله حدخل الجيش يوم 18/7/2011
    ادعولي بقي

  45. mohamed said

    شكلك كاتب كويس لانك بتكتب قصه حقيقه بكثير من المبالغه يعنى فى مشهد لما اترشحت ضابط تم تغيير المعامله وكده مش حقيقى لان اللى هناك عارفين ان ده مجرد ترشيح وانه نسبه كبيره مش هتكمل ولسه قدامك حوارات كتير ارجه وكشف هيئه وكشف طبى وده لانى لسه بعمل ورق الجيش والمعامله محترمه جدا والمؤهلات العليا مش كل التخصصات ضابط هو فيه لغبطه كتير بس انت لغبطه اكتر علشان كشفوا عليك بره انما معظم الناس اللى فى الحلميه ما بتخرجش بره الحلميه تكشف الا اللى هيعملوا ابحاث وتحاليل وكده انما انا كان نظر كله كان جو وهو مرتين كشف بس مره كل التخصصات ويقولك لائق ولا غير لائق ومره تانيه لو انت غير لائق وبتكشف التخصص اللى انت طلعت فيه

  46. cars said

    cars…

    […]حكايتي مع الجيش المصري « أحمد المصري[…]…

  47. yassor said

    يا جماعه كنت عايز اعرف هو مركز التدريب دا فين بالظبط..بيقولولى ف الهرم وانا المفروض ادخل الشهر دا ومش عارف..هو مركز التدريب دا واحد بس يعنى ولا بيختلف من محافظه للتانيه؟

    أرجو الرد ضرورى

  48. omr said

    انا فلسطيني حاصل علي الجنسية المصرية اعاني من مر ض التهاب الكبد الوبائي ب عمري هل اخد اعفاء جيش علما باني مقيم بمصر الجديدة وما هو المطلوب مني !

  49. دردشة بنات مصر , شات بنات مصر…

    […]حكايتي مع الجيش المصري « أحمد المصري[…]…

  50. Rona said

    اعجبني كثيراً طريقة سردك للحوار صراحة

  51. Ahmed Sakr said

    حكاية مدهشة واثرت إعجابي
    ارجو أن نرى جديد مقالاتك الرائعة

  52. اشكرك بشدة على هذه المقالة والحكاية التى أعتقد صحيحة 100% لما مريت به من تجربة مشابهة

  53. 2661994 said

    والله العظيم محصل فيك اللي حصل فيه

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

 
%d bloggers like this: