علاء بن الحاج محمد

علاء ابن الحاج محمد اللي ساكن في أول شارعنا بيمثل نفوذ من نوع جديد ظهر في الأحياء والمناطق الشعبية والمتوسطة علاء لما بيعدي من شارعنا كل الرؤوس بتتجه اليه

كل رجالة الشارع بيسلموا عليه

كل الشباب عاوزين رضاه

ويا سلام بقا لو علاء اتزنق في خدمة من حد

مش محتاج انه يطلب أصلا

لان اهل الشارع كلهم نفسهم بس علاء يرضى عنهم .

علاء بلطجي؟ لا طبعا

علاء ظابط شرطة؟ اهم بكتيررر

علاء وزير؟ مكانش اهل شارعه هايشوفوه اصلا

علاء شاب معاه دبلوم تجارة لكنه شاب مؤدب و هادي

لكن شاء القدر

ان علاء يشتغل في فرن العيش بتاع المنطقة .!!!

و بعد الشغل بيجيب لحبايبه كل واحد بجنيه عيش لحد بيته .

بجنيه عيش لحد البيت

ومن غير ما تنزل تقف في الطابور ده اللي بدايته في الخليفه ونهايتة في منغوليا

بزمتك برضه مش علاء يستحق انه يكون اهم واحد في شارعنا؟